Alex Oxlade-Chamberlain vill snúa aftur til Englands áður en félagaskiptaglugganum verður skellt í lás á mánudag.

The Sun segir frá þessu og jafnframt að Leicester og Wolves, sem eru í fallbaráttu í ensku úrvalsdeildinni, hafi áhuga á leikmanninum.

Oxlade-Chamberlain, sem er 31 árs gamall, gekk í raðir Besiktas í Tyrklandi sumarið 2023 og skrifaði undir þriggja ára samning. Hann er hins vegar ekki með fast byrjunarliðssæti í Tyrklandi og vill fara, þó svo Ole Gunnar Solskjær, sem tók við Besiktas á dögunum, hafi gefið í skyn að hann eigi hlutverk fyrir Englendinginn.

Hluti ástæðunnar fyrir því að Oxlade-Chamberlain vill fara aftur til Englands er kærasta hans, en þau eiga í fjarsambandi sem stendur.

Oxlade-Chamberlain gerði auðvitað garðinn frægan með Liverpool og Arsenal áður en hann hélt utan landsteinanna.