Neymar hefur formlega yfirgefið sádiarabíska félagið Al-Hilal, sem staðfestir brottför hans.

Hinn 32 ára gamli Neymar er að snúa aftur til Santos í heimalandinu, Brasilíu, eftir vonbrigðardvöl í Sádí. Al-Hilal keypti hann frá Paris Saint-Germain á hátt í 80 milljónir punda sumarið 2023 en kappinn spilaði aðeins sjö leiki fyrir félagið, mikið til vegna meiðsla.

„Al-Hilal og Neymar hafa í sameiningu ákveðið að rifta samningi leikmannsins. Takk fyrir og gangi þér vel Neymar,“ segir í stuttri yfirlýsingu félagsins.

Neymar þénaði ótrúlegar upphæðir í Sádí en þar sem hann kom svo lítið við sögu er hægt að líta á það sem svo að hann hafi þénað 7,4 milljarða króna fyrir hvern leik sem hann spilaði og 350 milljónir fyrir hverja spilaða mínútu.