Arsenal hefur formlega áfrýjað rauða spjaldinu sem Myles Lewis-Skelly fékk gegn Wolves í ensku úrvalsdeildinni um helgina.

Félagið hafði til klukkan 13 í dag til að skila inn tilsettum gögnum, máli sínu til stuðnings. Er talið að félagið hafi vísað í þegar rauða spjaldi Bruno Fernandes, fyrirliða Manchester United, gegn Tottenham fyrr á tímabilinu var snúið við, til að mynda.

Michael Oliver gaf Lewis-Skelly beint rautt spjald fyrir brot á Matt Doherty, en dómurinn hefur verið harðlega gagnrýndur og flestir á því að hann sé hneisa.

Ef dómurinn stendur fer Lewis-Skelly í þriggja leikja bann, missir af leikjum gegn Manchester City og Leicester í ensku úrvalsdeildinni og seinni leiknum gegn Newcastle í undanúrslitum enska deildabikarsins.