Arnar Gunnlaugsson hefur verið ráðinn landsliðsþjálfari íslenska karlalandsliðsins en þetta var staðfest í kvöld.
Það er KSÍ sem staðfestir fréttirnar en Arnar yfirgefur lið Víkings Reykjavíkur þar sem hann hefur náð frábærum árangri.
Arnar hefur lengi verið orðaður við starfið sem var laust eftir að samningur Age Hareide rann út í fyrra.
Arnar verður 52 ára gamall á þessu ári en hann var landsliðsmaður á sínum tíma og lék einnig í ensku úrvalsdeildinni.
Stjórn KSÍ fundaði um málið í kvöld og kemur fram í tilkynningunni að sambandið bjóði hann velkominn til starfa.
Eftir frábæran árangur með Víkingum var Arnar kvaddur á heimasíðu liðsins í kvöld með meðfylgjandi skilaboðum.
Tilkynning Víkings:
Knattpyrnudeild Víkings hefur samþykkt kauptilboð KSÍ í Arnar Gunnlaugsson.
Arnar hefur verið við stjórnvölinn í Hamingjunni síðan seint árið 2018 þegar hann tók við þjálfun liðsins af Loga Ólafssyni. Á sínu fyrsta tímabili leiddi Arnar liðið til sigurs í Mjólkurbikarnum en það var bara forsmekkurinn að því sem koma skyldi. Árið 2021 urðu Víkingar tvöfaldir meistarar (Íslands- og bikarmeistarar) í fyrsta skipti í sögu knattspyrnudeildar félagsins. Bikarmeistaratitill númer 3 kom svo árið 2022 og árið 2023 varð Víkingur aftur tvöfaldur meistari (Íslands- og bikarmeistarar).
Árangur liðsins í Evrópu fór stigvaxandi árin 2020-2023 en náði nýjum og áður óþekktum hæðum seint á síðasta ári. Það má með sanni segja að lið Víkings hafi skrifað söguna undanfarna mánuði en liðið var fyrst íslenskra liða til að vinna leik í deildarkeppni á vegum UEFA. Frammistaða liðsins tryggði þátttökurétt í umspili Sambandsdeildar Evrópu með 2 sigrum og 2 jafnteflum í deildarkeppni Sambandsdeildar Evrópu.
Bikarmeistari 2019,2021,2022,2023
Íslandsmeistarar 2021, 2023
Meistarakeppni KSÍ 2022, 2024
24 liða úrslit í Sambandsdeild Evrópu 2024/2025
Knattspyrnudeild Víkings þakkar Arnari kærlega fyrir einstaklega farsælt og gott samstarf og um leið óskum við honum farsældar í nýju starfi sem þjálfara A landsliðs Íslands.
Knattspyrnudeild Víkings mun tilkynna um ráðningu nýs aðalþjálfara á næstu dögum.
