Knattspyrnugoðsögnin Roberto Carlos harðneitar því að hann hafi verið að gista á æfingasvæði fyrrum félags síns, Real Madrid, undanfarna daga.

Spænskir og brasilískir miðlar hafa fjallað um einkalíf Carlos undanfarið sem er að skilja við eiginkonu sína til 15 ára.

Carlos og Mariana Luccon eiga saman tvö börn en þau gengu í það heilaga árið 2009 er Brassinn var enn knattspyrnumaður.

Skilnaðurinn ku vera ansi ljótur og erfiður en Carlos er verðmetinn á um 133 milljónir punda eftir mjög farsælan feril sem leikmaður.

,,Síðustu daga hef ég lesið rangar og skemmandi sögur sem snúast um mig og mína fjölskyldu. Ég virði mitt einkalíf en finnst eins og ég þurfi að tjá mig um þær sögusagnir sem hafa verið á kreiki,“ sagði Carlos.

,,Allt það sem ég hef lesið eru lygasögur og það er ekkert til í þessum fréttum sem eru búnar til svo fólk heimsæki ákveðnar vefsíður. Lögfræðingar mínir eru að skoða málið og munu taka ákvörðun um framhaldið.“

,,Ég bið fólk um að sýna mínu einkalífi virðingu og þakka fyrir stuðninginn á þessum erfiðu tímum.“