Arnar Gunnlaugsson, þjálfari Íslands- og bikarmeistara Víkings, var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni, sem sneri aftur á 433.is eftir sumarfrí fyrir helgi.

Víkingur tryggði sér sæti í deildarkeppni Sambansdeildarinnar á dögunum. Síðasti hjallinn sem liðið þurfti að komast yfir í undankeppninni var Santa Coloma frá Andorra og gerðu Víkingar það örugglega. Fyrri leiknum lauk með 5-0 sigri hér heima en þeim seinni með markalausu jafntefli.

Lærisveinar Arnars hlutu einhverja gagnrýni frá fólki í kringum fótboltann hér heima, þar sem það hefði komið sér vel fyrir íslensk lið að fá sigur frá Víkingi þarna.

„Við lögðum alveg áherslu á það á fundinum fyrir leiki og þess háttar en við vorum ekki tilbúnir að henda öllu. Fyrir hinn almenna áhugamann er þetta bara Andorra og þeim finnst að við eigum að rústa þessu liði en þetta virkar bara ekki þannig í þessum fótbolta. Það voru ótrúlegustu úrslit í þessum síðustu umferðum í Evrópukeppnunum, sveiflur á milli leikja.

Fyrst og fremst var okkar skylda að tryggja sigurinn. Það var líka búið að vera mikið leikjaálag og mikilvægt að komast í gegnum þetta lifandi. Það beið okkar langt ferðalag og svo mikilvægur leikur á móti Val tveimur dögum seinna. Okkur langaði mjög mikið að vinna en ég viðurkenni það að við fórum ekki alveg „all-in“ til að ná því markmiði,“ sagði Arnar er hann var spurður út í þetta.

Umræðan í heild er í spilaranum.