Ísland vann góðan sigur á Svartfjallalandi í Þjóðadeildinni í kvöld en leikið var á Laugardalsvelli.
Ísland vann 2-0 heimasigur en Orri Steinn Óskarsson og Jón Dagur Þorsteinsson komust á blað fyrir okkar menn.
Gylfi Þór Sigurðsson lagði upp annað mark Íslands í leiknum en hann var að glíma við matareitrun í leiknum og fór aðeins yfir það eftir leik.
,,Þetta var fínt kvöldverk hjá okkur, við gerðum það sem við þurftum að gera. Við héldum hreinu, vorum solid varnarlega og skoruðum tvö mörk,“ sagði Gylfi.
,,Undir lokin voru þeir alltaf hættulegir að skora eitt mark og fengu smá meðbyr en sem betur fer þá vörðumst við nokkum vel og héldum hreinu.“
,,Ég fékk einhvern vírus í nótt og hef verið mjög slappur í dag, af öllum dögunum þá kom þetta akkúrat í dag. Ég hafði ekki mikla orku þess vegna tók hann mig útaf eftir 60 mínútur.“
,,Ég vona að þetta séu svona 24 tímar og að ég byrji að skána á morgun.“