Chelsea ætlar að treysta á undrabarnið Estevao Willian eða Messinho er hann gengur í raðir félagsins.
Þetta segir Givemesport á Englandi en Messinho eins og hann er oft kallaður er einn efnilegasti leikmaður Brasilíu.
Chelsea hefur náð samkomulagi við Palmeiras um kaup á Messinho en skrifað var undir alla samninga í júní – hann kostar enska félagið 56 milljónir punda.
Hann mun hins vegar ekki ganga í raðir liðsins fyrr en hann nær 18 ára aldri og mun vera til taks á tímabilinu 2025/2026.
Chelsea ætlar að gefa undrabarninu tækifæri með aðalliðinu en talið var að hann yrði lánaður til Strasbourg í Frakklandi.
Þrátt fyrir að vera 17 ára gamall hefur Messinho spilað tvo landsleiki fyrir Brasilíu og er með 11 mörk og átta stoðsendingar í 37 leikjum fyrir Palmeiras.