Srdjan Tufegdzic þjálfari Vals hefur ekki náð að snúa við gengi liðsins eftir að hann tók við af Arnari Grétarssyni á þessu tímabili.

Valur tapaði 3-2 gegn Víkingi í gær eftir að hafa komist í 0-2, Hólmar Örn Eyjólfsson var rekinn af velli og leikur Vals hrundi.

Jóhann Már Helgason fyrrum framkvæmdarstjóri Vals og Arnar Sveinn Geirsson fyrrum leikmaður Vals efast um hvort ráðningin á Túfa hafi verið góð og velta því fyrir sér hvort hann haldi áfram eftir tímabilið.

„Þetta hefur bara versnað og þetta var umdeild ráðning. Hann er geggjaður gæi, prófílinn á honum er ekki þannig að hann hafi unnið sér það inn að vera þjálfari Vals,“ segir Jóhann Már fyrrum framkvæmdarstjóri Vals í hlaðvarpinu Dr. Football.

Arnar Sveinn telur að Túfa hafi ekki verið rétti maðurinn á miðju tímabili. „Ég er þar, hefði Túfa getað verið option eftir tímabilið. Á þessum tímapunkti er þetta galið, ég vildi bara Óla Jó þarna inn. Hann sagði nei en það má alveg sannfæra menn,“ segir Arnar Sveinn og ár þar við Ólaf Jóhannesson sem hefur stýr Val í tvígang.

„Túfa hefur öllu að tapa þegar hann kemur inn, hann kemur inn í mölbrotið lið og hefur öllu að tapa. Hann er ekki ósvipaður Arnari Grétarssyni, taktík og það voru ekkert brjálæðislega miklar breytingar að fá hann inn.“

„Óli hefði komið inn, engu að tapa og með virðingu frá honum. Hann þekkir Gylfa og fær virðinguna hans, svo hefði hann verið í léttleika. Þetta eru örfáir mánuðir, það var það sem Valur þurfti.“

Jóhann Már vill að Valur hringi í fyrrum landsliðsþjálfara Íslands. „Hringja í Erik Hamren, tékka á honum.“