Paul Scholes fyrrum miðjumaður Manchester United segir stærsta vandamál liðsins vera það að leikmenn virðast ekki vera í formi til að klára leiki.
Scholes sá sína menn fá á kjaftinn um helgina þegar liðið tapaði 0-3 gegn Liverpool.
„Þetta var erfiður leikur, þeir verða að átta sig á því við hverja þeir voru að spila og það er langt í land fyrir United,“ segir Scholes.
„Miðsvæðið er stór veikleiki, Liverpool var miklu betri þar. Það sem ég tók mest eftir á vellinum var að Liverpool virkaði í betra formi og með meiri kraft á miðsvæðinu. Kobbie Mainoo var lengi í gangi og Bruno Fernandes virkaði bara orkulaus. Joshua Zirkzee þarf fleiri leiki til að komast í gang.“
Scholes segr lítið búið að tímabilinu en er hissa á því að sjá marga leikmenn United í veseni með að klára leiki. „Þetta var það sem mér fannst mest sláandi, tímabilið var að byrja en af hverju eru þeir ekki í formi.“
„Ef þú þarft að taka miðverði út af í hverjum leik af því að þeir eru ekki í formi, þá ertu í veseni. Þú átt aldrei að taka út miðverði nema vegna meiðsla.“
„Það er hægt að nota Evrópumótið sem afsökun en Liverpool var með leikmenn þar, önnur lið voru með leikmenn þar og þau eru ekki í neinu veseni.“