Fyrrum landsliðsmaðurinn Emil Hallfreðsson var gestur þeirra Helga Fannars Sigurðssonar og Hrafnkels Freys Ágústssonar í nýjasta þætti Íþróttavikunnar á 433.is, en þættirnir koma út vikulega í mynd og á hlaðvarpsveitum.

Það er rúmt ár síðan Emil lagði skóna á hilluna eftir glæstan feril, þar sem hann gerði garðinn lengst af frægan á Ítalíu og spilaði þá 73 A-landsleiki fyrir Íslands hönd. Eftir ferilinn hefur kappinn til að mynda snúið sér að því að reka veitingastaðinn Olifa, en hann er einnig að þreifa fyrir sér í umboðsmennsku.

„Ég er aðeins búinn að vera að hjálpa strákum úti og það er eitthvað sem ég ætla að stækka, samt bara á réttum tíma og ekki vera að þvinga neitt áfram,“ sagði Emil í þættinum.

„Það er stefnan að það verði mitt aðalverkefni. Það tekur smá tíma að koma þessu af stað og komast almennilega inn í þetta. Ég vinn með mínum umboðsmönnum úti á Ítalíu sem ég var með. Þeir eru mér til halds og trausts og eru frábærir.“

Emil flýtir sér þó hægt í þessum efnum.

„Ég ætla bara að leyfa þessu að gerast náttúrulega og ekki þvinga eitt eða neitt áfram. Maður þarf að finna réttu leikmennina og þeir þurfa að fíla þig líka.“

Umræðan í heild er í spilaranum.

Íþróttavikan er í boði Bola léttöl og Lengjunnar