Cristiano Ronaldo sér sig ekki starfa í knattspyrnuheiminum eftir að ferlinum lýkur. Frá þessu greinir hann í nýju viðtali í heimalandinu, Portúgal.
Ronaldo er 39 ára gamall en er enn á fullu með landsliði sínu, sem og sádiarabíska liðinu Al-Nassr. Einhverjir myndu halda að Ronaldo, sem er einn besti knattspyrnumaður sögunnar, snúi sér að þjálfun eftir að ferlinum lýkur, eða starfi tengdu fótboltanum.
„Það er erfitt að sjá mig fara í þjálfun einn daginn. Í mínum huga er ég ekki að spá í að þjálfa neitt lið,“ segir Ronaldo hins vegar í viðtalinu og bætir við að hann sjái sig ekki starfa í kringum fótboltann almennt.
Ronaldo segir jafnframt að hann vonist til að spila í nokkur ár til viðbótar.
„Ég veit ekki hvenær ég legg skóna á hilluna, eftir 2-3 ár kannski. Það verður sennilega hér hjá Al-Nassr. Ég er mjög ánægður hjá þessu félagi og í þessu landi. Mig langar að vera hér áfram.“