Yfirgnæfandi líkur eru á því að Gylfi Þór Sigurðsson miðjumaður Vals verði í landsliðshópi Age Hareide fyrir leikina gegn Tyrklandi og Serbíu í Þjóðadeildinni.

Hareide mun kynna 23 manna hóp sinn fyrir leikina á miðvikudag.

Gylfi lék síðast með landsliðinu í október á síðasta ári en þá skoraði hann tvö mörk í sigri á Liechtenstein og varð þar með markahæsti leikmaður í sögu landsliðsins.

Samkvæmt heimildum 433.is hefur KSÍ sent inn til Vals um að Gylfi sé á meðal þeirra sem koma til greina í hópinn. Þetta þarf KSÍ að gera nokkru áður en hópurinn er kynntur.

Yfirleitt eru það í kringum 40 leikmenn sem eru á slíkum lista og félagslið þeirra látin vita að leikmaðurinn komi til greina í næsta landsliðsverkefni.

Það verður þó að teljast líklegt að Gylfi Þór komi inn í landsliðshópinn núna en hann hefur ítrekað talað um að ástæða þess að hann sé enn í fótbolta sé til að spila fyrir landsliðið.