Hansi Flick, stjóri Barcelona, veit ekki hvenær félagið getur notað Dani Olmo í fyrsta sinn en hann samdi við félagið í sumar.
Olmo var ein af hetjum Spánar á EM í sumar en liðið fór alla leið og vann mótið í Þýskalandi.
Fyrsta leik Barcelona í deild lauk með 2-1 sigri á Athletic Bilbao en Olmo var ekki í leikmannahópnum – hann er enn ekki skráður í hóp Barcelona.
Vegna fjárhagsvandræða á Barcelona í erfiðleikum með að skrá Olmo til leiks en Flick vonast til þess að hann verði klár í næstu viku.
,,Ég bara veit það ekki, ég vonast til að geta notað hann á þriðjudaginn,“ sagði Flick við blaðamenn.
,,Þetta eru hlutir sem við getum ekki breytt, við verðum að sætta okkur við stöðuna. Við vissum af þessu þegar hann skrifaði undir.“
,,Ég einbeiti mér að því sem við getum gert í dag. Við vildum þrjú stig í fyrsta leik og fengum þau.“