Ally McCoist, goðsögn Rangers, viðurkennir að hafa lent í ansi óþægilegu atviki er hann var leikmaður félagsins á sínum tíma.

McCoist spilaði yfir 60 landsleiki fyrir Skotland og tæplega 600 leiki fyrir Rangers og raðaði þar inn mörkum.

McCoist lenti í ansi óhugnanlegu atviki á sínum tíma er lögreglan bankaði á dyrnar og varaði hann við því að ónefnd dama væri sloppin úr haldi af geðdeildinni.

Þessi kona hefði elt McCoist í dágóðan tíma áður en hún var lögð inn á spítala en ekki löngu seinna var hún komin á götur borgarinnar á ný en án leyfis.

McCoist var spurður út í það hvort hann hefði lent í óhugnanlegu atviki sem leikmaður og hafði þessa sögu að segja en vildi þó ekki fara út í mörg smáatriði.

,,Já klárlega, lögreglan bankaði einu sinni á dyrnar hjá mér. Þetta var þegar ég bjó í East Kilbride,“ sagði McCoist.

,,Ég ætti ekki að fara út í smáatriðin en lögreglan mætti á staðinn til að láta mig vita að ákveðin manneskja hefði sloppið úr haldi. Ég sver til Guðs.“

,,Þeir vildu vara mig við, sögðu mér að hafa augun opin og sýndu mér mynd af manneskjunni.“

McCoist viðurkennir að hafa verið dauðhræddur eftir að hafa heyrt þessar fréttir en sem betur fer þá fór allt vel að lokum.