Ítalski blaðamaðurinn Alfredo Pedulla orðar Ademola Lookman, leikmann Atalanta, nú óvænt við Arsenal og Liverpool.
Hinn 26 ára gamli Lookman þekkir ensku úrvalsdeildina eftir að hafa spilað þar með Everton, Fulham og Leicester. Hann heillaði alla í vor með því að skora þrennu í úrslitaleik Evrópudeildarinnar í sigri Atalanta á Bayer Leverkusen.
Samkvæmt Pedulla bauð Arsenal 50 milljónir evra í leikmanninn en Atalanta vill um 65-70 milljónir.
Svo gæti farið að Arsenal noti Jakub Kiwior, varnarmann sinn, sem hluta af skiptunum. Pedulla segir þá að Liverpool fylgist einnig með gangi mála.
Lookman er fæddur á Englandi og spilaði fyrir yngri landslið þjóðarinnar en valdi að spila fyrir nígerska A-landsliðið.
