Í upphafi þessa árs tilkynnti þessi 76 ára gamli Svíi um veikindi sín og sagðist eiga ár eftir í besta falli. Um er að ræða fyrrum landsliðsþjálfara Englands, sem og liða eins og Manchester City, Roma, Lazio og Fiorentina.
Frá því Eriksson tilkynnti um veikindi sín hefur hann einmitt heimsótt marga af fyrrum heimavöllum sínum. Þá upplifði hann draum sinn um að stýra Liverpool-liði á Anfield í mars í leik þar sem goðsagnir félagsins mættu goðsögnum Ajax.
„Ég hef átt gott líf. Við erum öll hrædd við að hugsa til dagsins þar sem þetta klárast, þegar við deyjum. En lífið snýst líka um dauðann. Þú verður að samþykkja hann fyrir það sem hann er,“ segir Eriksson.
Eriksson vonast til að fólk hugsi hlýtt til sín eftir að hann er farinn en hvetur fólk til að njóta lífsins lifandi.
„Þegar þetta er búið segir fólk vonandi: „Hann var góður maður.“ Það munu ekki allir gera það en vonandi mun fólk muna eftir mér sem jákvæðum náunga sem gerði sitt besta.
Ekki líða illa, brosið. Takk fyrir allt, þjálfarar, leikmenn, stuðningsmenn. Þetta hefur verið frábært. Hugsið vel um ykkur og lifið lífinu. Bless.“