Norski miðjumaðurinn Sander Berge er á leið til Fulham frá Burnley og mun gangast undir læknisskoðun í dag.
Berge hefur verið orðaður við Manchester United undanfarna daga, en nú er Fulham að klófesta hann á 25 milljónir punda.
Kappinn gekk í raðir Burnley frá Sheffield United í fyrra, en bæði lið féllu úr ensku úrvalsdeildinni sem nýliðar í vor.
United vill þó krækja í miðjumann og snýr sér nú aftur að Manuel Ugarte hjá Paris Saint-Germain.
Leikmaðurinn var búinn að semja um eigin kjör við United í síðasta mánuði en félögin náðu að lokum ekki saman.
Nú eru viðræður hafnar á ný. Rauðu djöflarnir vonast til að fá Ugarte á láni með kaupskyldu næsta sumar.