Kjaftasaga hefur verið á kreiki í kringum íslenska boltann um að Gylfi Þór Sigurðsson sé ósáttur hjá Val og hafi beðið um að fá að rifta samningi sínum áður en félagaskiptaglugganum lokaði á dögunum. Formaður knattspyrnudeildar Vals segir þetta ekki rétt.
Það kom fram í Þungavigtinni að Gylfi hafi viljað yfirgefa Val fyrir gluggalok á dögunum og reynt að fá samningi sínum rift. Þá var einnig vakin athygli á þessu í Innkastinu á Fótbolta.net.
Börkur Edvardsson, formaður knattspyrnudeildar Vals, segir í samtali við 433.is að það sé ekki rétt að Gylfi hafi viljað fara frá Val eða að hann hafi reynt að fá samningi sínum rift. Jafnframt segir Börkur að Gylfi sé ekki ósáttur hjá félaginu.
Bað Gylfi um að fá að fara? „Nei.“ Bað Gylfi um að fá að rifta samningi sínum? „Nei.“ Er Gylfi ósáttur hjá Val? „Nei,” segir Börkur við 433.is.
„En hann, eins og við öll sem erum í kringum félagið, er ósáttur með gengi liðsins. Það er undir okkur í stjórn, hjá þjálfarateymi og leikmönnum að snúa þessu gengi við,“ segir Börkur.
Það hefur lítið gengið upp hjá Val undanfarnar vikur og er liðið svo gott sem úr leik í toppbaráttu Bestu deildarinnar. Arnar Grétarsson var á dögunum rekinn úr stöðu þjálfara liðsins og tók Srdjan Tufegdzic, Túfa, við.
„Túfa hefur komið sterkur inn, hann er mjög faglegur í öllu starfi og mikill félagsmaður. Hann er með sömu framtíðarsýn og við. Nú er það hjá okkur utan vallar, þjálfurum og leikmönnum að snúa við gengi liðsins,“ segir Börkur.
Gylfi gekk í raðir Vals í vetur eftir glæstan feril í atvinnumennsku. Hann gerði tveggja ára samning við Hlíðarendafélagið.