Leikur liðanna, sem bæði eru í fallbaráttu í Bestu deildinni, átti að fara fram 8. ágúst í Kórnum en var honum frestað þar sem í ljós kom skömmu fyrir leik að annað markanna væri brotið. Mótanefnd KSÍ frestaði leiknum til 22. ágúst og studdi stjórn KSÍ síðar þá ákvörðun.
KR kærði hins vegar þessa niðurstöðu. Telur félagið hana gefa slæmt fordæmi og að félög geti í framtíðinni gert velli sína óleikhæfa og hagnast á því.
„Við bíðum eftir niðurstöðu frá þeim fundi (Aganefndar á morgun) og svo hafa félögin stuttan tíma til að ákveða hvort þau ætli að áfrýja eða ekki,“ sagði Jörundur Áki Sveinsson, starfandi framkvæmdastjóri KSÍ, í samtali við 433.is í dag.
Ljóst er að tvær niðurstöður koma til greina, að leikurinn fari fram á fimmtudag eða að KR verði dæmdur 3-0 sigur.
„Þetta verður að fara sína leið í okkar kerfi, dómstólaleiðina. Við verðum að bíða og sjá.“