Gylfi Einarsson, fyrrum atvinnu- og landsliðsmaður og nú sparkspekingur á Símanum Sport, er viss um að eitthvað hafi komið upp á milli Mohamed Salah og Jurgen Klopp á bak við tjöldin í fyrra.

Salah skoraði og lagði upp í fyrstu umferð ensku úrvalsdeildarinnar um helgina í 0-2 sigri Liverpool á Ipswich. Hann byrjar því vel undir stjórn Arne Slot, sem tók við sem knattspyrnustjóri í sumar eftir að Jurgen Klopp hætti.

Gylfi sagði í Vellinum á Símanum Sport í gær að það megi sjá að það sé léttara yfir Salah á þessari leiktíð en þeirri síðustu.

„Það gerðist klárlega eitthvað milli Salah og Klopp í fyrra, þetta var orðið eitthvað súrt,“ sagði hann.

Það var mikið fjallað um samband Klopp og Salah í vor eftir að þeir rifust meðal annars á hliðarlínunni gegn West Ham.

„Hann er ferskari núna, maður sér það á honum,“ sagði Gylfi enn fremur um málið.