Chris Brazell hefur verið rekinn sem þjálfari Gróttu í Lengjudeild karla en frá þessu er greint í kvöld.

Brazell er Englendingur og hafði gert fína hluti með Gróttu en tímabilið í sumar hefur ekki verið nógu gott.

Grótta er á botni deildarinnar með 13 stig, jafn mörg stig og Dalvík/Reynir sem er með betri markatölu.

Grótta er með verstu markatöluna í Lengjudeildinni og tapaði heima gegn einmitt Dalvík/Reyni í gær.

Brazell hefur nú fengið sparkið frá félaginu sem vonast til að halda sér uppi í næst efstu deild í sumar.

Englendingurinn hefur þjálfað hjá Gróttu frá 2019 en hann byrjaði starf í yngri flokkum félagsins.

Tilkynning Gróttu:

Stjórn knattspyrnudeildar Gróttu hefur ákveðið að Chris Brazell láti af störfum sem þjálfari meistaraflokks karla. Stjórn telur nauðsynlegt að ráðast í breytingar á þessum tímapunkti en Gróttuliðið er í harðri fallbaráttu nú þegar fjórðungur er eftir af Lengjudeildinni.

Chris Brazell tók til starfa hjá Gróttu í árslok 2019 og hefur síðan þá unnið mikið og gott starf fyrir félagið. Chris var yfirþjálfari yngri flokka í þrjú ár, aðstoðarþjálfari meistaraflokks karla í eitt tímabil og er nú á sínu þriðja tímabili sem þjálfari meistaraflokks. Allan sinn tíma hjá Gróttu lagði Chris ríka áherslu á að bæta starfsumhverfi þjálfara og auka fagmennsku í starfi knattspyrnudeildar.

Hann er óhræddur við að fara nýjar og spennandi leiðir í þjálfun og hefur verið öðrum þjálfurum innblástur í þeim efnum. Ferskir vindar blésu um Vivaldivöllinn með komu Chris og honum tókst sannarlega að setja mark sitt á félagið.

Grótta þakkar Chris innilega fyrir samstarfið og óskar honum velfarnaðar í framtíðinni. Tilkynnt verður um nýjan þjálfara meistaraflokks karla innan tíðar.