Adam Ægir Pálsson átti stórleik fyrir lið Perugia í kvöld sem spilaði við Latina í ítölsku C deildinni.
Adam gekk nýlega í raðir Perugia frá Val og var að byrja sinn fyrsta leik fyrir félagið.
Sóknarmaðurinn gerði sér lítið fyrir og skoraði þrennu í leiknum sem Perugia vann að lokum örugglega, 4-1.
Adam byrjar því frábærlega fyrir sitt nýja félag og vonandi nær hann að stimpla sig rækilega inn í næstu leikjum.
Guðlaugur Victor Pálsson spilaði sinn fyrsta leik fyrir Plymouth sem spilar í næst efstu deild Englands.
Guðlaugur Victor lék í hægri bakverði en Plymouth tapaði leiknum 4-0 gegn Sheffield Wednesday. Um var að ræða leik í fyrstu umferð.
Kristian Nökkvi Hlynsson var þá hetja Ajax sem vann 1-0 sigur á Heerenveen í hollensku úrvalsdeildinni.
Orri Steinn Óskarsson skoraði einnig íslenskt mark en hann komst á blað fyrir FC Kaupmannahöfn sem vann Sonderjyske 2-0.
