Angel Di Maria, fyrrum leikmaður Manchester United og Real Madrid, hefur greint frá því af hverju hann samdi ekki við uppeldisfélag sitt 2023.
Di Maria var sterklega orðaður við Rosario Central í Argentínu í fyrra áður en hann gerði samning við Benfica í Portúgal.
Vængmaðurinn hafði áhuga á að semja við uppeldisfélagið en fjölskyldu hans var hótað eftir að fréttir bárust um að hann væri mögulega á leið aftur heim.
Di Maria er 36 ára gamall í dag en hann er án félags eftir ansi gott tímabil með Benfica í vetur.
,,Foreldrum mínum og nágrönnum þeirra var hótað eins og fjölmiðar greindu frá á þeim tíma,“ sagði Di Maria í samtali við blaðamenn í heimalandinu.
,,Þessir mánuðir voru skelfilegir. Við gátum bara setið þarna og ekki upplifað drauminn sem við vildum.“
Di Maria svaraði svo þeim sem gagnrýndu hann fyrir að taka ekki skrefið og lét allt flakka í viðtalinu.
,,Þeir sem skilja ekki stöðuna, þeir eru ekki að setja sig í mín spor í eina sekúndu. Það er létt að áreita fólk á samskiptamiðlum án þess að upplifa það sama og hinn aðilinn gengur í gegnum.“