Þetta var meðal annars rætt í útvarpsþætti Fótbolta.net á laugardag. Þar voru tekin fyrir viðbrögð netverja við frétt miðilsins þar sem skrifuð höfðu verið upp ummæli Óskars Hrafns Þorvaldssonar um frammistöðu Ronaldo.
„Nei fyrir mér núna í þessum leik og síðustu leikjum líka lítur þetta út eins og forseti einhvers bananalýðveldis hafi hringt í þjálfarana og sagt: ‘Heyrðu, sonur minn, sem getur ekkert í fóbolta verður að byrja sem framherji’. Þetta er bara svona. Þeir eru tíu Portúgalarnir, og hann væflast um völlinn og lyftir höndum. Þetta er gjörsamlega ‘pathetic’,“ sagði Óskar á RÚV.
„Það er eins og það sé myllusteinn um hálsinn á honum. Það er í raun ótrúlegt að Portúgalirnir séu manni færri og búnir að draga sig inn í 8-liða úrslitin en þetta grín getur ekki gengið lengur af því að þetta grín er að snúast upp í algeran harmleik.“
Þegar viðbrögðin við umræddri frétt er skoðuð er óhætt að fullyrða að margir hafi verið ansi blóðheitir, enda á Ronaldo marga aðdáendur hér á landi.
„Óskar Hrafn sannaði sig sem heimskasta drullusokk sem ég hef á minni heilögu ævi heyrt tala um fótbolta,“ skrifaði einn.
„Sama hatursumræðan og annarsstaðar. Hvert erum við komin? Frábær fótboltamaður einn sá allra besti. Við ættum að þakka honum margar góðar stundir,“ skrifaði annar.
Það voru þó einnig þó nokkrir sem stóðu með Óskari og voru sammála ummælum hans.
„Allt rétt sem Óskar sagði þarna og þeir sem reyna að malda í móinn eru blindaðir af gömlum tímum.“
Hér að neðan má sjá þrumuræðu Óskars á föstudagskvöldið.
Cristiano Ronaldo fékk það óþvegið frá Stofunni. Óskar Hrafn🗣️ pic.twitter.com/VuQX9G2XDT
— RÚV Íþróttir (@ruvithrottir) July 5, 2024