Enska landsliðið var að sjálfsögðu til umræðu í sérstöku hlaðvarpi Íþróttavikunnar, þar sem EM og íslenski boltinn voru í fyrirrúmi.

England er komið í 8-liða úrslit þar sem liðið mætir Sviss á morgun. Frammistaða liðsins hefur þó ekki verið neitt til að hrópa húrra fyrir. Því var velt upp í þættinum hverjir í enska landsliðinu hafi valdið mestum vonbrigðum.

„Kane hefur ekki komið með neitt að borðinu,“ sagði Helgi Fannar Sigurðsson þá.

Hörður Snævar Jónsson tók til máls en hann telur að Kane gangi ekki heill til skógar, sem útskýri frammistöður hans.

„Kane er svo ólíkur sjálfum sér að ég bíð eftir fréttinni þegar England dettur út að það komi fram að Kane sé meiddur og þurfi að fara í aðgerð. Hann var eitthvað að ströggla undir restina hjá Bayern og það er augljóst að maðurinn gengur ekki heill til skógar.“