Það er enn ekki ljóst hvort enski landsliðsmaðurinn Jude Bellingham verði refsað fyrir athæfi sitt er hann fagnaði marki sínu í sigri á Slóvakíu í 16-liða úrslitum EM um síðustu helgi. Svipað athæfi hans á Spáni í vetur gæti hjálpað.
Eftir ömurlega frammistöðu Englands bjargaði Bellingham liðinu með því að jafna með hjólhestaspyrnu í blálok venjulegs leiktíma. Enska liðið vann svo í framlengingu.
Handahreyfingar hans er hann fagnaði marki sínu vöktu athygli og var því velt upp hvort þær gætu komið honum í vandræði. Vill hann sjálfur meina að þær hafi beinst að vinum hans í stúkunni en ekki varamannabekk Slóvaka, eins og hefur verið haldið fram.
Meira
Sjáðu hvað Bellingham gerði í gær og náðist á myndband – Lendir hann í vandræðum?
Verði Bellingham fundinn sekur um óviðeigandi hegðun fær hann sekt eða bann. Hjá enska knattspyrnusambandinu eru menn bjartsýnir á að Bellingham fái ekki bann. Sekt þykir líklegri niðurstaða og svo gæti farið að niðurstaða fáist ekki einu sinni í málið fyrr en eftir EM.
Nú kemur fram í enskum miðlum að það gæti hjálpað Bellingham að hann fagnaði á svipaðan hátt í leik Real Madrid gegn Barcelona í vetur. Það sanni að fagnið hafi ekki beinst að leikmönnum Slóvakíu.
UEFA sendi Bellingham bréf í gær þar sem sambandið krafði hann um að útskýra sitt mál. Honum voru gefnir þrír sólarhringar til að svara.
England mætir Sviss í 8-liða úrslitum EM á morgun og má sem stendur búast við að Bellingham spili þann leik.
