Amad Diallo hefur greint frá því að hann sé tilbúinn að enda ferilinn á Old Trafford þrátt fyrir fá tækifæri með aðalliðinu í Manchester.
Diallo er leikmaður Manchester United en hann fékk lítið að spila í vetur og var það að hluta til vegna meiðsla.
Vængmaðurinn hefur tvívegis verið lánaður burt frá félaginu eftir komu frá Atalanta á Ítalíu en hann verður samningslaus á næsta ári.
Diallo er 22 ára gamall og er opinn fyrir því að spila fyrir United allan ferilinn ef það tækifæri gefst.
,,Ég er mjög ánægður hérna, ég held að allir séu ánægðir með mig því ég er alltaf brosandi og sendi frá mér jákvæða orku. Af hverju ekki að spila hér allt mitt líf?“ sagði Diallo.
,,Það var ekki auðvelt að meiðast á síðustu leiktíð og ég var lengi frá en það mikilvæga er að koma til baka sterkari en áður.“