Tveir leikir fóru fram í Bestu deild kvenna í kvöld.
Valur tók á móti Þrótti og það stefndi í jafntefli þar til hin 16 ára gamla Ragnheiður Þórunn Jónsdóttir skoraði dramatískt sigurmark Vals í blálokin.
Lokatölur 1-0 og Valur því með 30 stig, jafnmörg og topplið Breiðabliks. Þróttur er í sjöunda sæti með 10 stig.
Það var sömuleiðis aðeins skorað eitt mark þegar Þór/KA tók á móti FH. Ída Marín Hermannsdóttir skoraði sigurmark Hafnfirðinga af vítapunktinum seint í fyrri hálfleik.
FH er í fjórða sæti með 19 stig, nú aðeins 2 stigum á eftir Þór/KA sem er í þriðja sætinu.