Knattspyrnuaðdáendur voru margir agndofa í gær er lið Gíneu var kynnt til leiks á Ólympíuleikunum í Frakklandi.
Enginn annar en Naby Keita, fyrrum leikmaður Liverpool, var mættur á svið og hélt á fána landsins fyrir framan myndavélarnar.
Keita er í dag leikmaður Werder Bremen í Þýskalandi en hann vann ensku úrvalsdeildina með Liverpool 2020.
Það kom í raun öllum á óvart að sjá Keita í þessu aukahlutverki en hann er leikmaður Gíneu sem tekur þátt á mótinu.
,,Að hann sé að taka að sér þetta verkefni er stórfurðulegt,“ skrifar einn og bætir annar við: ,,Við höfum mögulega séð meira af honum hérna en með Liverpool.“
Keita glímdi við mörg meiðsli er hann var leikmaður Liverpool og var ekki of vinsæll á meðal allra stuðningsmanna félagsins.