„Ég meiddi mig í hnénu en það er ekki búið að staðfesta að það sé slitið. Ég fer í myndatöku og þá kemur það í ljós. Ég er að vonast til að ég komist í myndatöku í dag en það er ekki öruggt,“ sagði Elmar í samtali við 433.is nú í morgunsárið.
Hinn 37 ára gamli Elmar segir ljóst að sé um krossbandsslit að ræða muni hann ekki snúa aftur á völlinn. Hann er með samning við KR út næstu leiktíð.
„Þá klárar maður bara ferilinn ári fyrr en planið var. Ég sé mig ekki koma aftur miðað við hvernig leikstíllinn minn er og hvað yrði lítið eftir þegar ég gæti mögulega komið til baka. Þá færi maður bara að einbeita sér að einhverju öðru.“
En ef krossbandið er ekki slitið, heldurðu að þetta séu meiðsli sem munu halda þér frá vellinum í einhvern tíma?
„Ég hreinlega geri mér ekki grein fyrir því. Ég held að annað hvort sé þetta bara slitið eða þá að þetta er bara eitthvað smotterí. Þetta gæti verið „over extended knee“ og þá eru þetta bara 2-4 vikur,“ sagði Elmar.
Elmar sagði þá að tilhugsunin um að geta ekki hjálpað KR í þeirri brekku sem liðið er í um þessar mundir í Bestu deildinni sé slæm.
„Það væri bara rosalegur skellur. En ég get nú þá vonandi hjálpað á einhvern annan hátt ef það kemur í ljós að þetta sé slitið krossband.“
