Það var Sir Jim Ratcliffe, nýjasti hluthafinn í Manchester United, sem tók ákvörðun um að Mason Greenwood myndi ekki snúa aftur til félagsins. The Athletic segir frá.
Greenwood var á dögunum seldur frá United til Marseille fyrir rúmar 23 milljónir punda. Hann var á láni hjá Getafe á Spáni á síðustu leiktíð og stóð sig vel. Það var þó ákveðið að hann myndi ekki spila fyrir United á ný.
Stór ástæða fyrir því er saga sóknarmannsins unga utan vallar, en hann gerði sig sekan um gróft ofbeldi gagnvart kærustu sinni og nú barnsmóður. Mál á hendur honum hélt honum frá vellinum í langan tíma en var að lokum látið niður falla þegar lykilvitni steig til hliðar.
Ratcliffe, sem eignaðist fyrr á árinu um fjórðungshlut í United og tók yfir knattspyrnuhlið rekstursins, taldi að það yrði of mikil truflun að fá Greenwood inn í liðið á ný vegna þeirrar gagnrýni frá samfélaginu sem sú ákvörðun hefði valdið.
Einnig þurfti United að fá inn fjármuni til að rétta af bókhaldið og því reyndist það góður kostur að selja Greenwood. Rauðu djöflarnir fá svo 50 prósent af næstu sölu á kappanum.