Real Madrid horfir nú í kringum sig og leitar að miðverði eftir að hafa misst af Leny Yoro til Manchester United.

Hinn 18 ára gamli Yoro gekk í raðir United frá Lille á dögunum, en upphaflega var talið líklegra að hann færi til Real Madrid.

Spænska félagið horfir annað og segir The Athletic að Aymeric Laporte sé á óskalista félagsins.

Um er að ræða fyrrum leikmann Manchester City, en hann fór til Al-Nassr í Sádi-Arabíu í fyrra. Hann átti frábært Evrópumót á dögunum og var lykilmaður í liði Spánar sem hampaði titlinum.

Það yrði þó flókið að fá Laporte, en hann þénar ansi vel í Sádí.

Real Madrid er einnig sagt hafa áhuga á Mats Hummels. Sá varð samningslaus og yfirgaf Dortmund fyrr í sumar.