Blikar unnu leikinn 4-2. Varamannabekkur var skipaður meiddum leikmönnum eða ansi ungum og óreyndum. Til að mynda var 14 ára sonur Pálma, Alexander Rafn Pálmason, á bekknum.
„Varamannabekkurinn var gjörsamlega óreyndur. Finnur Tómas er meiddur og var ekki að fara að taka þátt. Jói Kristinn er líka meiddur og var ekki að fara að taka þátt. Hinir eru nánast krakkar – og ekki bara nánast, það eru krakkar þarna inn á milli sem hafa ekki spilað leik í deildinni, eða ekki einu sinni í bikar eða Reykjavíkurmóti eða slíku,“ sagði Guðmundur Benediktsson í Stúkunni í gær.
„Þetta eru skilaboð til stjórnar og þeirra sem sjá um peningana um að það þurfi að stækka hópinn heilmikið,“ bætti hann við.
Atli Viðar Björnsson var einn af sérfræðingum þáttarins í gær og tók hann til máls.
„Maður hefur heyrt af því að þjálfarar beiti slíkum brögðum, að senda óbein skilaboð með því að nýta ekki bekkinn sinn eða vera með ungan og óreyndan bekk. Ég geri mér enga grein fyrir því hvort það hafi verið staðan hjá Pálma í gær.“
Baldur Sigurðsson segir ljóst að það sé mikil þörf á að fá inn leikmenn í KR og auka breiddina.
„Það vantar marga leikmenn í þetta lið, miðað við þessa stöðu sem er komin upp – og það er ótrúlegt að hún hafi raungerst. Stefnan þeirra er ekki að fara í einhverja þróun og koma ungu strákunum inn, miðað við kaupstefnuna í vetur. Það er verið að kaupa dýra leikmenn til að ná árangri og þess vegna þurfa þeir að stækka hópinn.“
KR er í ansi vondri stöðu í Bestu deild karla. Liðið er í níunda sæti, 2 stigum fyrir ofan fallsvæðið eftir fimmtán umferðir.