Ægir Jarl Jónasson, leikmaður danska C-deildarliðsins AB, fékk greinilega hörð viðbrögð við færslu sinni á Instagram í kvöld, en hann var þar staddur á leik Lyngby og FC Kaupmannahöfn í úrvalsdeildinni.
Ægir gekk í raðir AB á dögunum. Jóhannes Karl Guðjónsson tók nýlega við liðinu og fékk hann til liðs við sig. Liðið er á fullu á undirbúningstímabilinu en Ægir skellti sér að sjá þá Sævar Atla Magnússon og Kolbein Birgi Finnsson taka á móti FCK í kvöld. Kaupmannahafnarstórveldið vann leikinn 0-2.
Vegna sögulegs rígs milli AB og Lyngby féll færsla Ægis hins vegar alls ekki vel í kramið hjá stuðningsmönnum fyrrnefnda liðsins.
„Ég vil biðja stuðningsmenn AB innilegrar afsökunar á síðustu færslu minni. Ég áttaði mig ekki á þeim stóra sögulega ríg sem er á milli AB og Lyngby. Ég er ekki fullkominn og var mættur þarna til að styðja félaga mína frá Íslandi sem buðu mér,“ skrifaði Ægir á Instagram fyrir skömmu, en hann er búinn að eyða færslunni frá leiknum.
„Ég lofa ykkur að ég mun gera allt sem ég get fyrir AB svo við náum okkar sameiginlegu markmiðum. Svona mistök munu ekki eiga sér stað aftur. Ég er klár í næsta leik gegn Brønshøj á morgun!“