Toni Kroos viðurkennir að hann sé reiður út í enska dómarann Anthony Taylor eftir leik þýska landsliðsins á EM.
Heimamenn í Þýskalandi duttu úr leik í 8-liða úrslitum gegn Spánverjum sem fóru alla leið og unnu mótið.
Þýskaland vildi hins vegar fá vítaspyrnu í leiknum eftir að boltinn fór í hönd Marc Cucurella, leikmanns Spánar, innan vítateigs.
Taylor ákvað að treysta VAR og kíkti ekki í skjáinn til að dæma sjálfur um hvort rétt ákvörðun hafi verið tekin.
,,Ég hef sleppt því að tjá mig hingað til, ég verð að viðurkenna að ég sá þetta ekki á meðan leiknum stóð,“ sagði Kroos.
,,Ég var ekki í stöðu til að sjá að þetta væri nokkuð augljós hendi eða ekki svo þú ert ekki reiður út í dómarann á því augnabliki.“
,,Ég varð reiður þegar ég sá atvikið eftir leikinn. Hann hefði allavega átt að kíkja í skjáinn. Ég held að vesenið sé það að hann hafi vitað að hann þyrfti að dæma vítaspyrnu ef hann færi í skjáinn.“