KA tekur á móti Val í undanúrslitum Mjólkurbikars karla í kvöld. Sæti í úrslitaleik gegn Víkingi eða Stjörnunni er undir.
Leikurinn er áhugaverður fyrir margar sakir en þarna er Arnar Grétarsson, þjálfari Vals, til að mynda að mæta sínu fyrrum félagi. Hann yfirgaf KA seint á tímabilinu 2022 og um haustið var tilkynnt að hann myndi stýra Val tímabilið eftir.
Síðan hafa þessi lið mæst í fjórum mótsleikjum og Valur unnið þá alla. Þrír þeirra voru í deild og einn í Lengjubikar, en deildabikarleikurinn vannst í vítaspyrnukeppni. Tveir þeirra fóru fram á Hlíðarenda og tveir fyrir norðan.
Margir velta fyrir sér hvort Gylfi Þór Sigurðsson og Jónatan Ingi Jónsson verði með Val í kvöld. Jónatan fór meiddur af velli í síðasta leik en Gylfi virðist nálgast endurkomu eftir sín meiðsli.
Veðbankar eru hliðhollir Völsurum fyrir kvöldið en stuðull á sigur þeirra á Lengjunni er 1,85. Stuðull á sigur KA er 3,41 og 3,92 á jafntefli.
Leikurinn hefst klukkan 18 á Greifavellinum á Akureyri.