Brandari sem Hjörvar Hafliðason var með á RÚV í gær varð til þess að Kristjana Arnarsdóttir gat ekki hætt að hlæja.
Það var létt yfir fólki í upphitun RÚV fyrir leik Portúgal og Slóveníu í 16-liða úrslitum EM í gær. Ljóst var að einhver verulega fyndin ummæli voru látin falla skömmu áður en kveikt var á myndavélunum.
Kristjana, sem stýrir umfjölluninni, átti erfitt með sig fyrir hlátri þegar hún var að opna þáttinn. „Ég verð að biðja ykkur afsökunar á þessu,“ sagði hún við þá Hjörvar Hafliðason og Arnar Gunnlaugsson, sem voru með henni í setti.
Hjörvar, sjálfur Dr. Football sagði frá því í þætti sínum í dag hvað hefði gerst en Salih Heimir Porca starfsmaður RÚV kom þar við sögu.
„Þetta var ótrúlegt, málið var það þarna starfar snillingurinn Porca. Á meðan leikjum stendur er hann að kenna manni að bera fram nöfn frá Júgóslavíu, hann hafði verið með þriggja mínútna kennslu um Benjamin Sesko,“ sagði Hjörvar um málið.
Grín á bak við tjöldin slysast stundum með inn í beina📺🤣 pic.twitter.com/JMX8CfpZbW
— RÚV Íþróttir (@ruvithrottir) July 1, 2024
„Svo kemur Höddi Magg þarna fram og hann kallar á hann ´Höddí´. Ég kalla þá á hann og segi að það sé Höddi, ekki Höddí. Ekkert fyndnara en þetta, hún byrjar að hlæja. Svo hélt þetta bara áfram.“
„Porca fannst þetta að sjálfsögðu fyndið líka, Kristjana náði sér að lokum og stóð sig frábærlega eins og alltaf.“