Andrei Kanchelskis, fyrrum leikmaður Manchester United, fékk slæmt glóðurauga í slagsmálum á bar í Moskvu á dögunum.

Hinn 55 ára gamli Kanchelskis, sem lék fyrir landslið Sovétríkjanna og síðar Rússlands á sínum tíma, var staddur á bar að horfa á úrslitaleik EM milli Spánar og Englands þegar hann átti í útistöðum við annan mann. Orðaskipti urðu að slagsmálum og kom Kanchelskis illa út úr þeim.

„Það er í lagi með mig núna. Þetta var smá ágreiningur eftir úrslitaleikinn á EM en það tengdist samt ekki leiknum sjálfum,“ sagði Kanchelskis í rússneskum fjölmiðlum.

Kanchelskis gekk í raðir United árið 1991 og vann tvo Englandsmeistaratitla og einn bikarmeistaratitil til að mynda. Hann lék einnig með Fiorentina, Rangers, Manchester City og Southampton áður en hann lauk ferlinum í Sádi-Arabíu.

Eftir ferilinn helti Kanchelskis sér út í þjálfun.