Grótta hefur ekki unnið í átta leikjum í röð í Lengjudeildinni og tapað síðustu sex. Á þessum slæma kafla hefur mátt skynja pirring Chris í viðtölum eftir leiki.
„Hann er farinn að væla yfir öllu og kennir fréttamönnum Fótbolta.net helst um allt. Hann tekur pirringinn út á þeim. Þetta er orðið þannig að strákarnir sem eru að skrifa fyrir okkur vilja bara ekki skrifa um Gróttu lengur, þeir nenna ekki að hitta hann,“ sagði Elvar Geir Magnússon, ritstjóri Fótbolta.net, í útvarpsþætti stöðvarinnar á X-inu um helgina.
Elvar tók því næst dæmi, en í viðtali eftir síðasta leik Gróttu, tap gegn Keflavík, var Brazell allt annað en sáttur við fréttamann Fótbolta.net fyrir spurningu sem hljóðaði svona: „Ertu enn sannfærður um að þú getir snúið þessu við?“
„Ef ég væri það ekki væri ég ekki hér. Ef ég á að vera hreinskilinn virði ég ekki spurninguna þína,“ svaraði Chris í viðtalinu sjálfu en þar með er ekki öll sagan sögð.
„Hann reyndi að fronta þetta í viðtalinu sjálfu en um leið og Sverrir (fréttamaður) slökkti á myndavélinni fékk hann að heyra það,“ sagði Elvar.
