Arnar Gunnlaugsson, þjálfari Víkings, hefur staðfest það að félagið hafi áhuga á Guðmundi Andra Tryggvasyni.
Um er að ræða leikmann Vals sem verður samningslaus í haust og gæti horft í kringum sig.
Guðmundur Andri er fæddur 1999 og hefur spilað níu leiki með Val í sumar án þess að skora mark.
Sóknarmaðurinn þekkir til Víkings og lék þar sumarið 2019 en fór svo í atvinnumennsku þar sem hlutirnir gengu ekki upp.
Arnar staðfesti í samtali við Fótbolta.net eftir leik gegn Fram í gær að áhuginn væri til staðar.
,,Við létum Val vita að við ætlum að tala við hann. Að sjálfsögðu, ég hef alltaf sagt það þarf enginn að fara í fýlu út af því, að þegar góðir bitar koma á markað þá verður Víkingur að taka þátt í því,“ sagði Arnar.
Arnar bætir við að það séu litlar líkur á að Guðmundur komi í sumarglugganum og að hugsað sé til næsta tímabils.