Santi Cazorla hefur staðfest það að hann hafi rætt við Mikel Arteta um að snúa aftur til Arsenal í sumar.
Þetta eru fregnir sem koma mörgum á óvart en Cazorla er 39 ára gamall og leikur með Real Oviedo í dag.
Cazorla er enn að spila og stefnir á að koma liðinu í efstu deild í umspilsleik gegn Eibar í næstu viku en sigurliðið fer í úrslitaleikinn sjálfan.
Hvort Cazorla leggi skóna á hilluna eftir það er óljóst en hann gæti mögulega tekið að sér þjálfarastarf í London.
,,Ég er með sérstaka tengingu við Arsenal. Ég var þar í sex frábær ár og ég veit að fólkið þar elskar mig,“ sagði Cazorla.
,,Auðvitað var ég heppinn að fá að deila búningsklefa með Mikel Arteta og hann er þjálfari liðsins í dag.“
,,Við höfum rætt endurkomuna en núna er ég að einbeita mér að því að hjálpa Oviedo og njóta þess að spila fótbolta.“
,,Eftir það þá getum við skoðað framtíðina. Arsenal er það félag sem hefur alltaf opnað dyrnar fyrir endurkomu.“