Riðlakeppni EM í Þýskalandi var rækilega gerð upp í nýjasta þætti af Íþróttavikunni. Þar fengu þeir Helgi Fannar og Hrafnkell Freyr lögfræðinginn og hlaðvarpsstjörnuna Jóhann Skúla Jónsson í heimsókn.
Enska liðið hefur legið undir harðri gagnrýni í riðlakeppninni fyrir spilamennsku sína. Liðið vann þó sinn riðil með 5 stig. Hrafnkell telur að gagnrýnin eigi fullan rétt á sér.
„Þú ert með besta leikmanninn á Spáni, einn besta leikmanninn í Þýskalandi, besta leikmanninn á Englandi og þeir sýna nákvæmlega ekki neitt. Mér finnst þetta eiga fullan rétt á sér,“ sagði hann.
Jóhann segir ekki rétt hjá leikmönnum enska liðsis að svara gagnrýninni í viðtölum, eins og hefur verið gert.
„Auðvitað á þetta rétt á sér að einhverju leyti. En þetta snýst bara um að fara upp úr riðlinum og þeir eru búnir að vinna riðilinn. En mér finnst þeir bjóða rosalega mikið upp á þessa umræðu. Að Harry Kane sé að mæta í viðtal á miðju stórmóti að ræða það sem Gary Lineker og Alan Shearer eru að tala um. Það er ekki að fara að hjálpa neinum, ég veit ekki við hverju hann bjóst. Þetta var bara að fara að vera meiri olía.“
Umræðan í heild er í spilaranum.