Hinn 19 ára gamli Kobbie Mainoo mun byrja leik Englands gegn Slóvakíu í 16-liða úrslitum Evrópumótsins á sunnudag. Þetta kemur fram í Telegraph.
Gareth Southgate landliðsþjálfari er enn að finna sína bestu miðju. Í síðasta leik gegn Slóveníu kom Conor Gallagher inn á miðjuna fyrir Trent Alexander-Arnold en eins og í leikjunum á undan var frammistaða enska liðsins ósannfærandi.
Í leiknum við Slóvakíu kemur Mainoo inn ef marka má nýjustu fréttir. Hann kom inn á sem varamaður í síðasta leik og þótti standa sig vel. Kappinn kom afar öflugur inn í lið Manchester United á tímabilinu og tryggði sæti sitt í enska liðinu fyrir EM.
England vann riðil sinn þrátt fyrir að fá aðeins 5 stig. Enska þjóðin kallar eftir alvöru frammistöðu gegn Slóvakíu í 16-liða úrslitunum.