Bukayo Saka, leikmaður Arsenal og enska landsliðsins, hefur tjáð sig um þær vangaveltur að hann gæti spilað í vinstri bakverði gegn Slóvakíu í 16-liða úrslitum Evrópumótsins.
Kieran Trippier, sem er réttfættur, hefur leyst stöðu vinstri bakvarðar á mótinu en verið í vandræðum. Saka, sem er einn besti leikmaður Englands fram á við, spilaði sem bakvörður á yngri árum og hefur það fram yfir Trippier að vera örfættur.
„Ég held að það sé engin lausn fyrir England að spila mér út úr stöðu,“ sagði Saka við BBC í dag.
Hann er þó klár ef þess þarf.
„Þjálfarinn ræður þessu og við treystum honum fyrir að velja besta liðið á leikdegi.“
England mætir Slóvakíu á sunnudag eftir að hafa valdið nokkrum vonbrigðum í riðlakeppninni, þrátt fyrir að hafa hafnað í efsta sæti.