Í næstefstu deild, Lengjudeildinni, spila liðin í sætum tvö til fimm upp á að það að fylgja efsta liði deildarinnar upp í Bestu deildina. Þetta fyrirkomulag tók gildi í fyrra en í 2. deild er það enn þannig að efstu tvö liðin fara beint upp í deildina fyrir ofan.
„Auðvitað er ekkert sanngjarnt að Þórsarar séu einhverjum 11 stigum á eftir Njarðvík og Fjölni en í dauðafæri á að fara upp úr deildinni,“ segir Mikael um fyrirkomulagið í hlaðvarpinu Þungavigtinni. Þór er í níunda sæti Lengjudeildarinnar, þó aðeins þremur stigum frá umspilssæti.
„Svo tapa ég einhverjum einum leik í 2. deildinni og sumarið er eiginlega bara farið. Það þyrfti eiginlega að fara með þetta fyrir mannréttindadómstól Evrópu, Villi Vill í málið. Við í KFA vorum með 41 stig í fyrra og fórum ekki upp á markatölu. Svo mætir Vestri með einhver 30 stig og er kominn upp í efstu deild. Hvað er sanngjarnt við þetta? Sjáið þið þetta í einhverjum öðrum löndum?“ sagði Mikael.
Þess má reyndar geta að Vestri endaði með 39 stig í Lengjudeildinni í fyrra. Liðið hafnaði í fjórða sæti en fór upp í Bestu deildina eftir sigur á Aftureldingu, sem hafnaði í öðru sæti, í úrslitaleik.