ÍA vann leikinn 3-2 en gestirnir héldu að þeir hefðu komist yfir snemma leiks þegar skot Jónatans Inga Jónssonar fór af Patrick Pedersen og í netið. Danski framherjinn var hins vegar dæmdur rangstæður en í endursýningu má sjá að dómurinn var kolrangur.
Helgi Mikael Jónasson fundaði aðeins með línuverði áður en þeir komust að þessari niðurstöðu.
„Ég sé þetta ekki en það er búið að skoða þetta og mér skilst að hann sé 2 metra frá því að vera rangstæður. Dómararnir báðust afsökunar í hálfleik. Það er svekkjandi að menn sjái þetta ekki því þetta er svo augljóst,“ sagði Arnar Grétarsson við Stöð 2 Sport eftir leik.
Þetta var tekið fyrir í Stúkunni á Stöð 2 Sport og þar voru menn gáttaðir á dómnum.
„Hvernig fá þeir þetta út? Eftir ráðstefnu ákveða það að þetta eigi ekki að standa. Hvernig er hægt að útskýra það?“ spurði Guðmundur Benediktsson.
„Þetta er glórulaus dómur og mér finnst ótrúlegt að Arnar skildi ekki froðufella yfir þessu í viðtalinu,“ sagði Albert Brynjar Ingason sem einnig var í setti.