Hún rifjar þetta upp í hlaðvarpinu Chess After Dark. Karólína gekk í raðir Bayern frá Breiðabliki árið 2021 en stóð þá til boða að spila fótbolta samhliða því að læra við Harvard.
„Það var kannski svolítið neikvæð umræða um fótboltann í Bandaríkjunum á þessum tíma. Þetta var svolítið: „Ef þú ferð þarna út muntu ekki komast í landsliðið.“ Það var svolítið umræðan,“ segir Karólína.
Hún vildi setja fulla einbeitingu á fótboltann.
„Þó ég tali ekki mikið um fótbolta þá elska ég hann og vil helst vera í honum 24/7. Svo Bayern var mitt val. Ég get alltaf farið í Harvard,“ segir Karólína létt í bragði.
Karólína spilar sem fyrr segir í dag með Bayer Leverkusen á láni frá Bayern. Er hún á leið inn í sitt annað tímabil þar.