Landsliðskonan Karólína Lea Vilhjálmsdóttir segir Laugardalsvöll í þeirri mynd sem hann er í dag óboðlegan. Hún ræddi þetta í hlaðvarpinu Chess After Dark.

Umræðan spratt upp þar sem Karólína var spurð að því hvort henni þyki skemmtilegra að spila á Kópavogsvelli eða Laugardalsvelli. Kvennalandsliðið spilaði tvo heimaleiki í Kópavoginum í vor en það er einmitt fyrrum heimavöllur Karólínu, sem í dag er á mála hjá Bayer Leverkusen á láni frá Bayern Munchen.

„Kópavogsvelli. Laugardalsvöllur er því miður ekki nógu góður. Hafiði séð klefana þarna? Það er smá pilla á KSÍ, þetta er ekki boðlegt. Ronaldo er að koma í þennan klefa, hann á að fá þennan klefa bara út af fyrir sig,“ sagði Karólína um Þjóðarleikvanginn.

Umræðan um nýjan þjóðarleikvang er svo sannarlega ekki ný af nálinni en Karólína tekur undir með þeim sem segja að aðgerða sé þörf.

„En ég elska Laugardalsvöll og þar er náttúrulega gras. En við þurfum að gera betur.“