Tveimur leikjum er nýlokið í Bestu deild karla.
Víkingur heimsótti Stjörnuna og voru meistararnir komnir í þægileg mál á fyrstu 20 mínútunum eða svo en Nikolaj Hansen og Karl Friðleifur Gunnarsson komu þeim í 0-2. Þannig var staðan í hálfleik.
Eftir um klukkutíma leik kom Helgi Guðjónsson Víkingi svo í 0-3 og var hann aftur á ferðinni með mark á 78. mínútu. Meira var ekki skorað og 0-4 stórsigur Víkings staðreynd.
Víkingur er með 30 stig á toppi deildarinnar en Stjarnan er í því sjöunda með 16 stig.
Í Vesturbænum tók KR á móti Fylki í fyrsta heimaleik Pálma Rafns Pálmasonar við stjórnvölinn.
KR leiddi í hálfleik með marki Kristjáns Flóka Finnbogasonar á 37. mínútu.
Þóroddur Víkingsson jafnaði metin fyrir Fylki snemma í seinni hálfleik en strax í kjölfarið skoraði Kristján aftur og kom heimamönnum yfir á ný.
Gestirnir svöruðu hins vegar á ný en Nikulás Val Gunnarsson jafnaði í 2-2 og þar við sat.
KR er í áttunda sæti með 13 stig en Fylkir er á botninum með 8.